بلوچستانے ملی زرمبش 28سالا رند چه بهمنے انقلاب ءَ                 

هنچوش که شما زانت گون بهمنے انقلابا مزنین جزبگے مئے راجے تها ودی بوت، بلوچستان ءِ راجی زرمبش، سازمان دمکراتیک مردم بلوچستان ءُ حزب اتحاد مسلمین تنها بلوچی تنظیم ات انت که مان بلوچستانءَ فعال ات انت.

 گونڈین مدتے رند سازمان دمکراتیک مردم بلوچستان پرشت و پروش بوت وبازینے چه سنگتان گون اے دگه سراسری حزب و سازمانان هوار بوت انت که بلکین وتی حق و حقوقءَ چه اے راهءَ بگرانت.

بلوچ ورنا مدتے ءَ رند پوه بُوت که گون اے تنظیمانے هواریءَ، بلوچ راجے حق گرگ نبیت. بازینے چه اے بلوچان پکر کت که گهتر انت گون بلوچی تنظیمے هور ببنت ءُ وتی جهدءَ دیما ببرانت . گڑا بازین راج دوستے چه وتی پیسریگین حزب و سازمانان در اتک ءُ گون بلوچستان ءِ راجی زرمبشءَ هوار ءُ وتی نوکین سیاسی جهدءَ را بنگیج اش کت.

سنگتان، گون شورویءِ پروشگ ءُ هنچوش 11سپتامبرءِ آیگءَ رند مزنین قدرتانے ڈنی سیاست په راجانی نفعءَ دیما روگاانتءُ هنچوش راجانی جنز وءُ جزبگ روچ په روچ گیشترءُ گیشتر بوهان انتءُپه لهتے چه ای راجان، سوبین و کامیابی آتکگ چوش که کُردان مان عراقءَ که عملی صورتءَ په وت واجهی رستگ انت.

 سنگتان اے چنت سال انت که مان مئے چپ ءُ چاگردان اتحاد ءُ هورکارئے گپ ءُ تران بوهگاانت. اے وت مستاگے انت په بلوچ راجے آجوئی ءُ وتواجهیءَ. اے مستاگی انت په بلوچستان ءِ راجی زرمبش ءُ هنچوش په پهکین بلوچستانے کواس و زانتکاران.بلئے مئے و شمئے پیرینان راست گوشتگ که په هلوا هلوا کنگ دپ شیرکن نبیت هنون بلوچ راجے متحد کنگ ءُعملی جدءُ جهدے وهد انت.هما وهدے بلوچےدپ شیرکن بیت که عملی تورا بیاین دیما. منی هیالا اے چارین چیزان مئے تپاکیءِ مادنءَ تچک تر کن انت :

1-گپ و ترانی جار گون پهکین بلوچ زانتکار و تنظیمان.

2-مزن دیوانےءِ گرگءِ جار و رند چه مزن دیوانا، گون اے دگه ڈنی سمیناران بهر زورگ

3-گون ایرانی تنظیمان گپ و تران کنگ.

4- گپ وتران گون حقوق بشرءِ  تنظیمان و بلوچ راج ءِ جنزءِ دیما برگ.

سنگتان، واجهین برات ءُ هاتونین گوهاران!

 تان وهدے که ما زاتی مفادانے سر‏ءَ راجی مفادانءَ ترجیح مدئین گڑا مئے راجے مسئله هچ بر حل نبیت ءُ ما ءُ شمارا باید انت که راجی مفادانے سرا تپاک ءُ یک ببئین.

 من چه بلوچستانءِ پهکین  تنظیمان ءُ اے دگه سیاسی کواس و دانشوران دزبندی کنان که آ گیشتر وتی جد ءُ جهدءَ گون تپاکی ءُ هورکاریءَ همگرنچ بکن انت. په راجے آجوئیءَ تپاکی ءُ هورکاری لازمی انت . بلوچستانے راجی مسئله ءِ راه حل ءُ بلوچانے حق ءُ حقوق ءِ گرگے مادن، تپاکی انت.

 راجانی تاریخ اشیرا پیش داشتگ ءُ ثابت کتگ که تپاکی هورکاری آجوئیءِ مستاگ انت.

نوهان سربازی